AS TARIFAS DO 2005 SEGUEN SENDO DISCRIMINATORIAS NO SUR DE GALICIA

* Vehículos lixeiros

 

Itinerario	Tarifa €	Km.	¿Cantos km percorres con 1€?
Vigo - Chapela	0,65	2	1 € = 3 km.
O Morrazo – Vigo	0,75	4	1 € = 5,3 km
O Morrazo – Pontevedra	1,85	15	1 € = 8,1 km
Vigo – Pontevedra	2,60	22	1 € = 8,4 km
Pontevedra - Santiago	3,85	60	1 € = 15,5 km
Santiago – A Coruña	4,50	70	1 € = 15,5 km
Vigo – Baiona *	1,25	25	1 € = 20 km
Jerez– Puerto Real (Cádiz)	1	27	1 € = 27 km

Despois da última subida de tarifas aplicada a 1 de xaneiro de 2005 podemos observar como somos tratados de maneira discriminatoria os usuarios dos diferentes tramos entre Vigo e Pontevedra que percorremos con 1 € de 3 a 8 km, mentras que noutros tramos da propia AP-9 chegamos ós 15,5 km. ¡Un escándalo!

Un erro do novo Ministerio de Fomento que aproba unhas tarifas sen estudiar o tema e correxir unha situación inxusta.

¿Por que non hai unha tarifa plana a tantos céntimos por km?

¿Por que non se abaratan os tramos de máis tráfico como sería o caso dos de Pontevedra – Vigo – O Morrazo? ¿Por que non se suprime a peaxe da Ponte de Rande que non conta con vía alternativa? ¿Por que non se suprime a peaxe no tramo urbano entre Vigo e Chapela?

Poderiamos facernos moitas máis preguntas pero con este incremento de tarifas tamén se incrementa a inxustiza e tanto a empresa concesionaria AUDASA coma o MINISTERIO DE FOMENTO NON TEÑEN EN CONTA OS INTERESES DOS USUARIOS SENÓN OS BENEFICIOS que aumentan ano tras ano descaradamente.

O caso de Pontevedra – Vigo é dos máis sangrantes porque xa ten unha tarifa máis elevada na actualidade ca no ano 2000, ano no que se acordou unha rebaixa do 19 % e se aumentou a concesión a AUDASA en 25 anos. Daquela eran 420 pts. e agora os 2,60 euros equivalerían a 432 pesetas.

Vigo – Baiona pertence á Autoestrada do VAL MIÑOR e ten unha tarifa máis branda porque foi financiada con fondos da Xunta – de todos nós – nunha boa porcentaxe.

E, por último, o caso que reseñamos ao final da Táboa JEREZ – CÁDIZ en comparación coas tarifas da nosa zona é realmente indignante. O anterior equipo ministerial do Sr. Cascos rebaixoulle a tarifa nun 50 % por decreto no ano 2001 e este novo equipo da Sra. ministra Magdalena Álvarez acordou xunto coa Xunta de Andalucía facerse cargo de pagarlle ese euro a tódolos usuarios neste ano 2005. ¡Manda carallo, na Habana! E aquí todos caladiños, o noso presidente Fraga, os nosos deputados do PSOE, etc. etc.

Agardamos un cambio de postura no goberno de ZP e ser tratados dunha maneira semellante a outros lugares. Este exemplo protagonizado pola gaditana señora ministra de fomento non nos gustou nada. Pareceríanos ben se aquí se suprimira a peaxe de Rande para todos e se acordara unha remodelación de tarifas en toda a AP-9 que fora xusta e non discriminatoria como segue a ser na actualidade.

 

O Morrazo, 1 de Xaneiro de 2005