A Plataforma remite un dossier a
altos cargos do Goberno e insta ó Ministerio de Fomento a suprimir a peaxe de
Rande segundo o acordado no Parlamento
O
dossier dispón de información sobre as sete manifestacións convocadas e as
campañas da Plataforma ante a falta de actuación e compromiso político da Xunta
de Galicia e do Goberno central coa cidadanía para suprimir a peaxe da ponte de
Rande, a pesar de teren recoñecido a inxustiza social que supón que a
concesionaria da autoestrada cobre este tramo cando non existe vía alternativa.
Contén
tamén unha escolma de máis de cen noticias aparecidas en xornais galegos nas
que se resume a traxectoria da reivindicación, con datos sobre “El PP anuncia
‘magníficas noticias’ sobre los peajes gallegos en breve” (páxina 3 de La Voz
de Galicia, 26 de novembro de 1999), “Rajoy promete eliminar el peaje en Rande
si el PP gana las elecciones” (páxina 1 de Faro de Vigo, 6 de febreiro de
2000), “Cuiña cree irrenunciables los objetivos sobre eliminación de peajes
consensuados con diputaciones y concellos” (páxina 3 de Diario de Pontevedra,
11 de febreiro de 2000) ou “Los vecinos del Morrazo podrán cruzar el puente de Rande
gratis antes de fin de año” (páxina 12 de Atlántico Diario, 10 de setembro de
2000).
Acompañando
esta documentación, adxúntase unha carta dirixida a cada un dos altos cargos na
que se insta a negociar a eliminación da peaxe, segundo o acordo tomado no
Parlamento, e advírteselles da preparación dunha nova campaña que difundirá un
cartel, semellante ó de Cuiña, para desmentir as promesas realizadas na última
campaña ás eleccións xerais con referencia ás declaracións doutro persoeiro do
PP. Xosé Cuiña, Manuel Fraga, Pío Cabanillas e Mariano Rajoy son algúns dos
políticos que recibirán este dossier informativo.