A PLATAFORMA CONVOCA A 7ª MARCHA POLA SUPRESIÓN DA PEAXE PARA O 5 DE ABRIL

Unha numerosa representación das comarcas de O Morrazo, Vigo e Pontevedra, reunida na tarde-noite de onte, despois de escoitar ós portavoces da xunta directiva as explicacións dadas sobre as últimas xestións realizadas tanto co presidente Fraga, o conselleiro Núñez Feijóo e o ministro Álvarez Cascos, optou por radicalizar as súas esixencias convocando a 7ª marcha pola supresión da peaxe na famosa Ponte de Rande para o día 5 de abril.

Respecto da reunión coa dirección da SEPI, que ultima nestes días a privatización do grupo ENA, ofrecida polo ministro Sr. Cascos, a Plataforma tomou a decisión de condicionar a súa asistencia á presencia na mesma do conselleiro de Política Territorial da Xunta para que acuda a defender institucionalmente os intereses da Comunidade Galega. Que estea presente incluso para explicarlle á SEPI e ó goberno central a inexistencia de vía alternativa á Ponte de Rande cos documentos da propia Xunta, os acordos do Parlamento galego a favor da supresión ou dos numerosos concellos e deputacións desde 1999.

A Asamblea Xeral da Plataforma acordou non estar disposta a xogar un papel de “negociación” en solitario e reclama dos Alcaldes e da Xunta que non se limiten a facer declaracións públicas nos medios de comunicación locais a favor da supresión. Esas declaracións que non van acompañadas dunha xestión real son puro electoralismo e deso temos sobrada experiencia. ¿Para que eleximos ós nosos representantes? ¿Para que lles pagamos? ¿Por qué non solicitan eles reunións ó máis alto nivel?

Respecto do argumento do Ministro de Fomento de que “no se puede poner en peligro el equilibrio económico-financiero de las concesionarias suprimiendo peajes”, lembrámoslle os datos publicados pola Empresa Nacional de Autopistas (ENA) que anunciou os últimos resultados como empresa pública. “ENA obtuvo un beneficio antes de impuestos de 77,4 millones de euros durante el ejercicio 2002, lo que supone un incremento del 14,1%. La facturación creció un 7,7% hasta alcanzar un total de 159,7 millones de euros”.

Fácilmente se comprende que se poden reducir os beneficios pensando nos usuarios de tramos de mobilidade obrigatoria en áreas metropolitanas e reequilibrar as tarifas para evitar as discrimancións actuais dentro da propia A-9.

A 7 ª MARCHA somente se suspenderá se no prego de condicións ou nas bases da privatización queda excluída a Peaxe por cruzar a Ponte de Rande para todos. A partir de agora a Xunta directiva ten o encargo de preparar a marcha utilizando como base as promesas incumpridas polos dirixentes do PP, especialmente polo vicepresidente Mariano Rajoy.

Tamén se tomou o acordo de solicitar a entrada na Plataforma NUNCA MÁIS e apoiar as súas reclamacións.

O Morrazo, 1 de marzo de 2002