A PLATAFORMA ACUSA AO MINISTERIO DE
FOMENTO DE IGNORAR AS DEMANDAS DA GALICIA SUR E ATENDER OUTRAS
CRITICA AOS DEPUTADOS SOCIALISTAS POR NON
EXPLICARLLE Á MINISTRA O CASO DA PONTE DE RANDE E AS TARIFAS ENTRE VIGO E
PONTEVEDRA
A Plataforma cidadá pola
supresión da peaxe reunida na tarde de onte acodou facer público un comunicado
no que se afirma que “non existe ningún argumento para manter unhas peaxes
discriminatorias en tódolos tramos da AP-9 entre Vigo e Pontevedra”, tramos
que, efectivamente poideron resultar máis caros no momento da construcción nos
anos setenta pero que están superamortizados a día de hoxe.
Os portavoces do
Ministerio de Fomento que argumentan na actualidade que “el puente de Rande y
el tramo Pontevedra – Vigo fueron los más caros de la AP-9 y por ello tienen
tarifas superiores en €/km” parece que ignoran que os incrementos de tráfico
producidos neses tramos producen a maioría dos beneficios para a concesionaria
AUDASA.
Vexamos algúns datos e
fagamos contas:
Desde 1995 o tráfico
entre Pontevedra e Vigo pasou de 19.415 vehículos a 40.700 diarios
(multiplicouse por dous nos últimos dez anos). Entre Vigo e O Morrazo pasou
nese mesmo período de 5.538 a 16.050 (multiplicouse por tres). Mentras, os
demais tramos entre Pontevedra – Santiago e Santiago – A Coruña rexistraban no
ano 2004: 20.000 e 22.000 vehículos/día respectivamente.
Resulta esclarecedor
comprobar a rentabilidade dos tramos e ver como entre Pontevedra - Vigo e Vigo
– O Morrazo se obteñen 41 millóns de € anuais, é dicir, 6.665 millóns de pts.
que amortizan de golpe a inversión na Ponte de Rande e en dous ou tres anos o
tramo completo.
Aquí non imos estar toda a
vida sometidos a esa teoría que esgrime Fomento. Desde o ano 2000 reclámase
oficiamente por parte de toda a sociedade (Xunta, Deputacións, Concellos, etc.)
que se remodelen as tarifas e se suprima a peaxe da Ponte de Rande, punto de
paso obrigado na área metropolitana.
Agora volve a tocarlle ás
Institucións facer xestións e non limitarse a facer declaracións públicas que
son moi bonitas pero resultan ineficaces.
Agora tócalle tamén aos
deputados galegos do PSOE facerse valer en Madrid para que cumpran o seu
programa e demostrar que non nos están defraudando. O mes que vén
cúmprese un ano das eleccións xerais e non vemos pasos en positivo para saír
desta situación inxusta en Galicia. Quizais a Ministra precise máis datos que
non lle aportan os deputados elexidos en Galicia nin o Sr. Touriño que é un bo
coñecedor destes temas.
Tanto á Sra. Ministra
Magdalena Álvarez como a Pérez Touriño dirixirase a Plataforma co ánimo de
explicarlle outra vez a situación actual e tamén as variacións que se
produciron como o incremento do tráfico superior ao estimado no contrato
concesional, para que fomento aprobe unha remodelación das tarifas tal como
reclama unanimemente a sociedade galega e propoña unha solución aos tramos
metropolitanos entre Vigo – Rande e O Morrazo. A ámbolos dous
solicitaráselle unha entrevista formal na que tamén se fará a petición de
asistencia a Antón Louro como coordinador dos deputados socialistas no
congreso.
O Morrazo, 8 de
febreiro de 2005
O Presidente da
Plataforma,
JESÚS CANCELAS FRANCO