ASAMBLEA XERAL DA PLATAFORMA POLA SUPRESIÓN DA PEAXE

O venres, día 28, ás 20 h. na Casa do Mar de Moaña, celebrarase unha importante Asamblea Xeral da Plataforma coa asistencia dos colectivos que a integran das comarcas de Vigo, O Morrazo e Pontevedra para analizar a situación actual, ser informados pola xunta directiva das últimas xestións –entrevista co ministro Álvarez Cascos, solicitude de entrevista coa dirección da SEPI que se encarga da privatización de AUDASA e das trabas burocráticas e prazos para solicitar o Bono-peaxe-.

Analizaranse as últimas intervencións no Parlamento galego nas que o portavoz do PP Juan Casares anunciou que a Xunta está “negociando” unha solución definitiva para a peaxe de Rande que non rompa o equilibrio económico-financieiro da concesionaria e xa fala da “tarxeta” como unha medida provisional e non como o último paso dado pola Xunta.

A directiva da Plataforma considera que na reunión coa SEPI en Madrid debería estar representada a propia Xunta ó máis alto nivel e non só a plataforma. Tamén poderían estar os alcaldes firmantes do documento institucional de febreiro do 2000 ou unha representación deles así como un avogado do gabinete xurídico da plataforma. Que a asistencia se limite só á plataforma parece unha incongruencia ou unha estratexia para marearnos.

Na asamblea haberá un debate sobre estes temas e tamén propostas de novas actuacións, entre as que non se descarta a convocatoria da 7ª MARCHA POLA SUPRESIÓN.

Asimesmo propoñerase a integración na Plataforma NUNCA MÁIS e someterase a votación este tema.

Respecto das declaracións do deputado do PP Juan Casares, a Xunta directiva quere lembrar a multitude de declaracións realizadas neste sentido e mentras non vexa a realidade desas negociacións co goberno central non pode crer absolutamente nada. A campaña de promesas do PP prodúcese sistemáticamente desde 1999 e, sobre todo, antes e durante as campañas electorais.

Por último, respecto do equilibrio economico-financiero de AUDASA e do grupo de autoestradas ENA que se vai privatizar, dicir que non existe problema ningún porque os beneficios do grupo no ano 2002 batiron tódolos records chegando a ser de 77,4 millóns de euros (12.878 millóns de pts). Beneficios que proceden das autoestradas galegas nun 70%. É doado comprender que se poden recortar eses beneficios coa supresión da peaxe de Rande e aínda así seguirían sendo rentables as concesionarias.

O Morrazo, a 26 de febreiro de 2003

A XUNTA DIRECTIVA,