ACORDO EN ANDALUCÍA SOBRE SUPRESIÓN DE PEAXE.

EN GALICIA, RANDE SEGUIRÁ AGARDANDO

 

A supresión da peaxe entre JEREZ e CÁDIZ será unha realidade dentro de dous meses segundo os acordos a que chegaron entre a Xunta de Andalucía e a concesionaria Aumar da AP-4 que tiña unha concesión ata o 2019 nese tramo de 25 km. co visto bo do Ministerio de Fomento, por ser o Estado o titular da vía.

A Xunta de Andalucía terá que abonar un total de 72 millóns de euros á concesionaria nun prazo de 15 anos e a empresa comprométese a asumir os costes de mantenemento da vía e a convertila en gratuita para todo tipo de vehículos.

Unha peaxe que na actualidade custa 1,05 € -cunha tarifa moi por debaixo da de Vigo-Pontevedra (2,60 €) nun tramo similar -e que, ademais, pasará á historia en poucos días.

Desde a Plataforma cidadá pola supresión da peaxe preguntámonos qué é o que fan os deputados socialistas da provincia de Pontevedra que aínda non souberon explicar á ministra de fomento o tema da peaxe inxusta da Ponte de Rande e tamén o das tarifas discriminatorias do sur de Galicia, tal como se pon de manifesto por tódolos estamentos da sociedade.

Tamén se pode comprobar como avanzaron as negociacións de cara ao rescate da concesión e non como aquí en Galicia en que a Xunta se limitou a poñer en marcha un BONO-PEAXE con moitas trabas burocráticas e que non resolve o problema a tódolos usuarios senón a unha minoría dos que teñen a obriga de circular pola Ponte de Rande.

Ademais dos deputados galegos en Madrid e da Xunta existen outras institucións máis próximas aos cidadáns como é o caso dos concellos e a deputación de Pontevedra que se limitan tamén a tomar acordos e a facer declaracións nos medios de comunicación. ¿Cando teñen pensado dirixirxe en serio ao goberno central que é o que ten as competencias como levamos dito tantas veces? Dirixirse para establecer as negociacións correspondentes e para que unha ou outra administración se faga cargo de liberarnos da inxustiza que padecemos desde hai 24 anos.

O exemplo andaluz é o primeiro que será realidade en pouco tempo con este novo goberno de Zapatero, pero aquí tamén houbo compromisos recollidos no programa electoral socialista que non podemos esquecer.

O Morrazo, 22 de marzo de 2005

O Presidente da Plataforma, JESÚS CANCELAS FRANCO