A PLATAFORMA RECLAMA QUE SE
DEIXE DE UTILIZAR ELECTORALMENTE O TEMA DA PEAXE DE RANDE E QUE SE CUMPRAN OS
PROGRAMAS
Reunida a directiva da Plataforma cidadá pola supresión da peaxe no
día de onte para analizar a situación das demandas unánimes da sociedade do sur
de Galicia e as manifestacións do Partido Popular de Galicia, as do Presidente
da Deputación de Pontevedra e as dos dirixentes socialistas, acordou facer
público o seguinte comunicado:
A Plataforma reclama que se deixe de utilizar electoralmente o tema
da peaxe de Rande e que se cumpran os programas. Recoméndalle aos que pasan en
coche oficial pola Ponte de Rande que deixen de utilizar electoralmente a peaxe
coma unha arma arroxadiza entre uns e outros e que fagan algo dunha vez.
Houbo un documento institucional do 10 de febreiro do 2000
no que estaban todos de acordo en reclamar ao Ministerio de Fomento a reducción
da tarifa entre Vigo e Pontevedra nun 50% -despois da rebaixa tan cacareada dun
19,13%, acordada días antes polo consello de ministros, incrementando a
concesión en 25 anos- e tamén a supresión universal da peaxe de Rande para todo
tipo de vehículos.
Pero daquela o PP nos gobernos da Xunta e de Madrid non o
cumpriu, así como tampouco fixo realidade as promesas anunciadas a bombo e
platillo polo Sr. Rajoy ou outros persoeiros.
Pola contra, noutras comunidades autónomas, noutros tramos
de autoestradas xa privatizadas suprimíronse peaxes con cargo ao Ministerio de
Fomento en tramos semellantes ao de Vigo-Pontevedra (ver acordos na web da
plataforma www.randeune.com, acordos tomados xa con Arias Salgado e logo
co Sr. Cascos nese ministerio de fomento que é realmente o competente nestas
vías.
Houbo rebaixas por decreto do consello de ministros que
chegaron ao 50% coma a de Jerez-Cádiz no 2001 e negativas a remodelar as
tarifas da AP-9 que curiosamente reclama hoxe mesmo a Deputación en mans do PP
en Pontevedra.
As contradiccións son evidentes. Realizouse unha
privatización do grupo ENA, na que estaba incluída a AP-9, que aportará a
maioría dos beneficios do grupo (perto dun 70%) ata o ano 2048 sen ningunha
contrapartida para Galicia. Daquela era perfectamente viable renunciar a unha
parte dos 1.600 millóns de € que ingresou o Estado e resolver estes problemas
que estaban plantexados desde había tempo.
No momento actual os deputados socialistas piden tempo para
o “estudio que din que se está a realizar” sobre a Ponte de Rande e que mentras
tanto se manteña o bono-peaxe ou se xeneralice para todos con cargo aos
presupostos da Xunta e das Deputacións, cando eles votaron en contra
sistematicamente deste sistema.
É urxente que os deputados socialistas e o candidato a
presidente da Xunta, Sr. Touriño lle expliquen en Madrid a inxustiza social que
padecemos desde hai 24 anos os usuarios do sur de Galicia e que debería ser o
Estado o que se fixera cargo de rescatar as peaxes onde non hai alternativa,
caso de Rande, ou remodelar as tarifas porque é o competente nestas
autoestradas segundo a lexislación vixente e, sobre todo, porque foi o que
ingresou a pasta da privatización.
Mentras a Sra. ministra de fomento non teña unha boa
información da inxustiza que existe aquí non haberá unha solución satisfactoria
para os usuarios.
Xa vai alá un ano do goberno de ZP e o tempo pasa deseguida.
Os pasos que se deron neste tema en Galicia por parte dos socialistas foron
nulos ata o de agora. Estivo ben apoiar as marchas pola supresión, as
manifestacións en contra da privatización e outras, pero agora falta o máis
importante: a solución definitiva na que todos estamos de acordo.
Por parte da Xunta, parcheouse a situación co bono-peaxe que
é minoritario e non vale para tódolos usuarios como ben sabemos. Púxose en
marcha debido á presión social e a tantas promesas incumpridas, non nos
engañemos.
A Plataforma seguirá reivindicando a única solución sensata
e urxente á problemática actual, é dicir, a supresión de Rande e a rebaixa do
50% no tramo Vigo-Pontevedra, porque é evidente que os usuarios non imos
permanecer pasivos ata o fin da concesión. Sería cousa de parvos pagar o dobre
ou o triple que noutros tramos, ou pagar peaxe sen ter outra alternativa á
Ponte de Rande eternamente.
O Morrazo, a 30 de marzo de 2005
A XUNTA DIRECTIVA